Bu gün Laçın Aereportunun açılışı olacaq

Bu gün – 2025-ci il mayın 28-də Laçın Beynəlxalq Hava Limanının rəsmi açılış mərasimi keçiriləcək. Təntənəli mərasimdə Azərbaycan Prezidenti İlham Əliyev, Türkiyə Prezidenti Rəcəb Tayyib Ərdoğan və Pakistanın Baş naziri Şahbaz Şərifin iştirakı gözlənilir.

Bu hava limanının istifadəyə verilməsi, Azərbaycanın 2020-ci ildə Vətən müharibəsində əldə etdiyi parlaq qələbənin daha bir mühüm simvoludur. Məhz həmin qələbə nəticəsində Laçın rayonu da daxil olmaqla bir sıra ərazilər 30 illik işğaldan azad edildi.

Qeyd edək ki, Laçın hava limanı azad edilmiş ərazilərdə inşa edilən üçüncü beynəlxalq hava limanıdır. Bundan əvvəl, Zəngilan Beynəlxalq Hava Limanı 2022-ci ilin oktyabrında, Füzuli Beynəlxalq Hava Limanı isə 2021-ci ilin oktyabrında istifadəyə verilmişdi. Hər iki hava limanı Prezident İlham Əliyevin və qardaş ölkələrin liderlərinin iştirakı ilə açılmışdı.

Bu hava limanları təkcə infrastruktur layihələri deyil, həm də Azərbaycanın suverenliyinin və ərazi bütövlüyünün təmin edilməsinin mühüm rəmzləridir. Onlar eyni zamanda regionda davamlı sülh, əməkdaşlıq və inkişaf üçün real zəmin yaradır.

Laçın Hava Limanının açılması ilə Qarabağ tamamilə Azərbaycanın nəzarətində olan hava nəqliyyat sistemi ilə əhatələnmiş olur. Bu, həm təhlükəsizlik baxımından, həm də beynəlxalq əlaqələrin genişləndirilməsi istiqamətində mühüm addımdır.